ໜ້າຫຼັກ >> ຂ່າວໜ້າໜຶ່ງ >> ເມືອງຄູນຄຳ ເລັ່ງປົວແປງຊີວິດການເປັນຢູ່ ຄອບຄົວປະຊາຊົນທີ່ໄດ້ຮັບການກະທົບຈາກໄພທຳມະຊາດນ້ຳຖ້ວມ
ເມືອງຄູນຄຳ ເລັ່ງປົວແປງຊີວິດການເປັນຢູ່ ຄອບຄົວປະຊາຊົນທີ່ໄດ້ຮັບການກະທົບຈາກໄພທຳມະຊາດນ້ຳຖ້ວມ
ວັນທີ 13 ກັນຍາ 2013 - ເວລາ 09:58:54 ເບິ່ງ 213 ຄຳເຫັນ 1

ຄືດັ່ງທີ່ຮູ້ນຳກັນແລ້ວວ່າ ເມືອງຄູນຄຳ ແຂວງຄຳມ່ວນ ກໍ່ເປັນເມືອງໜຶ່ງທີ່ໄດ້ຮັບຜົນກະທົບໜັກຈາກໄພທຳມະຊາດນ້ຳຖ້ວມ ໃນລະຫວ່າງວັນທີ 26-29 ກໍລະກົດ 2013 ທີ່ຜ່ານມາ ເຊິ່ງມັນໄດ້ສົ່ງຜົນກະທົບຕໍ່ບ້ານ-ເຮືອນ, ເນື້ອທີ່ທຳການຜະລິດ, ເສັ້ນທາງ, ສັດລ້ຽງ ແລະ ອື່ນໆ ຂອງປະຊາຊົນເສຍຫາຍຫຼາບພໍສົມຄວນ.

      ຈາກການປະເມີນຜົນລ່າສຸດຈາກຄະນະກຳມະການປ້ອງກັນ ແລະ ຄວບຄຸມໄພພິບັດຂັ້ນເມືອງ ມູນຄ່າການເສຍຫາຍເຖິງ 35 ຕື້ກວ່າກີບ ໃນນັ້ນຂົງເຂດກະສິກຳ 19 ຕື້ກີບ, ໂຍທາ 13 ຕື້ກີບ, ໄຟຟ້າ 200 ກວ່າລ້ານກີບ ແລະ ຂົງເຂດສຶກສາ 100 ກວ່າລ້ານກີບ. ມາເຖິງປະຈຸບັນນີ້ສະພາບການດັ່ງກ່າວໄດ້ແຫ້ງລົງເປັນທີ່ຮຽບຮ້ອຍແລ້ວປະໄວ້ພຽງແຕ່ສະຫຼັກຫັກພັງຕ່າງໆ ເປັນຕົ້ນແມ່ນເນື້ອທີ່ນາຖືກຖ້ວມຕາຍເນົ່າເປື່ອຍ, ເສັ້ນທາງຖືກນ້ຳເສາະເຈື່ອນ, ໂຮງຮຽນໂຕະ, ຕັ່ງຖືກນ້ຳພັດໄຫຼໜີ ແລະ ອື່ນໆ ຕໍ່ກັບສະພາບການດັ່ງກ່າວ ທ່ານ ແກ້ວລັນດອນ ຈັນທະປານີ ເຈົ້າເມືອງ ໆຄູນຄຳ ກ່າວຕໍ່ນັກຂ່າວປະຈຳແຂວງເມື່ອວັນທີ 11 ກັນຍາ 2013 ວ່າ: ພວກເຮົາ, ຄະນະພັກ, ອຳນາດການປົກຄອງ ແລະ ຄະນະກຳມະການປ້ອງກັນ ແລະ ຄວບຄຸມໄພພິບັດຂັ້ນເມືອງໄດ້ຮີບຮ້ອນແຕ່ງຕັ້ງ ແລະ ມອບວຽກໃຫ້ແຕ່ລະສະຫາຍຄະນະປະຈຳພັກເມືອງ, ກຳມະການພັກເມືອງ, ພະນັກງານວິຊາການ ເພື່ອຂຸ້ນຂ້ຽວລົງເຄື່ອນໄຫວໃກ້ຊິດຕິດແທດກັບພໍ່ແມ່ປະຊາຊົນ, ອຳນາດການປົກຄອງໃນ 24 ບ້ານທີ່ໄດ້ຮັບຜົນກະທົບ. ກວດກາ, ປະເມີນ ແລະ ໃຫ້ຄວາມອົບອຸ່ນຈິດໃຈ ໂດຍສະເພາະແມ່ນໄດ້ນຳເອົາເຂົ້າປາອາຫານ, ນ້ຳດື່ມລົງຊ່ວຍບັນເທົາທຸກປະຊາຊົນ. ໃນນັ້ນໄດ້ກວດກາດ້ານລະບົບຊົນລະປະທານ, ເສັ້ນທາງ ແລະ ເນື້ອທີ່ທຳການຜະລິດອື່ນໆ ຜ່ານການກວດກາປະເມີນຜົນຂອງການເສຍຫາຍແລ້ວເຫັນວ່າ: ເມືອງຄູນຄຳມີຄວາມຕ້ອງການຢ່າງຮີບດ່ວນເພື່ອເປັນການຟື້ນຟູຊີວິດການເປັນຢູ່ຂອງປະຊາ ຊົນດ້ານຂົງເຂດວຽກງານກະສິກຳ ສະເພາະແມ່ນການຜະລິດເຂົ້ານາແຊງໃນລະດູແລ້ງປີ 2013-2014 ຈະເຖິງນີ້ ໃນເນື້ອທີ່ແຜນການ 1,165 ເຮັກຕ່າ ໃນນັ້ນ ຕ້ອງການແນວພັນເຂົ້ານາແຊງ, ແນວພັນພືດ, ແນວພັນຄວາຍ, ງົວ, ໝູ, ແບ້, ສັດປີກ, ແນວພັນປາ, ຝຸ່ນ, ປຸຍ, ຢາປາບສັດຕູພືດ, ຢາປົວພະຍາດສັດ, ອຸປະກອນສັດຕະວະແພດ ລວມມູນຄ່າເຖິງ 4 ຕື້ກວ່າກີບ.

ສະແດງຄຳຄິດເຫັນຂອງທ່ານ
ຊື່ ແລະ ນາມສະກຸນ
ອີເມວ
ຄຳເຫັນ
Captcha
ທ່ານຕ້ອງການລຶບແທ້ບໍ່​ ?